Un vicepresident de Google a sautat dempuèi 41 150 mètres de nautada, luènh de l’atencion mediatica. La tòca es de desvolopar un vestit especial, comercial e autonòm que permeta d’explorar l’estratosfèra.

Alan Eustace, executiu e un dels vicepresidents de Google, a sautat en paracasuda dempuèi l’estratosfèra, a 41 150 mètres de nautada, e a batut lo recòrd mondial qu’aviá agantat Felix Baumgartner fa dos ans. Eustace montèt divendres passat amb un balon d’èli pendent doas oras e sautèt en casuda liura fins a agantar una velocitat maximala de 1322 quilomètres ora. Demorèt quinze minutas abans de tornar tocar tèrra dins lo desèrt del sud del Nòu Mexic.
 
Aquel nòu saut estratosferic fa partida d’un projècte per desvolopar un vestit especial, comercial e autonòm que permeta d’explorar l’estratosfèra.
 
Baumgartner faguèt istòria en octòbre de 2012 quand batèt lo recòrd en sautant en casuda liura dempuèi 39 000 mètres. Ara Alan Eustace a despassat l’eveniment de Baumgartner, mas o a fach d’un biais mai discret e luènh de l’atencion mediatica.